മലയാളത്തിന്റെ പ്രിയതാരങ്ങൾ പൃഥ്വിരാജ്,ബേസിൽ എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന പുത്തൻ മലയാള ചിത്രമാണ് ഗുരുവായൂരമ്പലനടയിൽ. ജയ ജയ ജയഹേ എന്ന ഹിറ്റ് സിനിമയ്ക്കു ശേഷം വിപിൻദാസ് സംവിധാനം ചെയ്യുന്ന ഗുരുവായൂരമ്പലനടയിൽ എന്ന ചിത്രത്തിന്റെ ടീസർ വലിയ ചർച്ചകളാണ് സോഷ്യൽ മീഡിയയിൽ ഉണ്ടാക്കി കൊണ്ടിരിക്കുന്നത്.
ചെറുതും,വലുതുമായ വേഷങ്ങളിലൂടെ ബേസിൽ മലയാളി പ്രേക്ഷകർക്ക് എന്നും പ്രിയപ്പെട്ട നടനാണ്. ടീസർ നൽകുന്ന സൂചനകൾ വച്ച് ഒരു ഗംഭീര എന്റർടൈനർ തന്നെയാകും സിനിമ സമ്മാനിക്കുക എന്ന കാര്യം നിസ്സംശയം പറയാം. ചിത്രത്തിൽ പൃഥ്വിരാജ് ഒരു നെഗറ്റീവ് റോളാണ് ചെയ്യുന്നതെന്ന സൂചനയും ടീസർ നൽകുന്നുണ്ട്.
ചിത്രം പ്രൊഡ്യൂസ് ചെയ്യുന്നത് പ്രിഥ്വിരാജ് പ്രോഡക്ഷൻസിന്റെ ബാനറിൽ സുപ്രിയ മേനോനാണ്‌. ചിത്രത്തിൽ ഒരു പ്രധാന വേഷത്തിൽ മലയാളികളുടെ പ്രിയതാരം അനശ്വര രാജനും എത്തുന്നുണ്ട്. ഇവരെ കൂടാതെ തമിഴ് കോമഡി താരം യോഗി ബാബുവും ചിത്രത്തിൽ ഒരു പ്രധാന വേഷത്തെ അവതരിപ്പിക്കുന്നുണ്ട്. ജഗദീഷ്, നിഖില വിമൽ തുടങ്ങിയ പ്രശസ്ത താരങ്ങളുടെ ഒരു നീണ്ടനിരയും ചിത്രത്തിൽ അണിനിരക്കുന്നു. എന്തായാലും ബേസിൽ- പൃഥ്വിരാജ് കൂട്ടുകെട്ടിൽ ഒരു കിടിലൻ സിനിമ തന്നെയായിരിക്കും ഗുരുവായൂരമ്പലനടയിൽ പ്രേക്ഷകർക്ക് സമ്മാനിക്കുക എന്നുതന്നെ പ്രതീക്ഷിക്കാം.
