മിനിസ്ക്രീൻ പ്രേക്ഷകർക്കിടയിൽ വളരെ ചുരുങ്ങിയ കാലയളവിൽ തന്നെ വളരെയധികം ചർച്ച ചെയ്യപ്പെട്ട ഒരു റിയാലിറ്റി ഷോയാണ് ബിഗ് ബോസ്. മലയാളികളുടെ പ്രിയ നടൻ മോഹൻലാൽ അവതാരകനായി എത്തുന്ന ബിഗ്ബോസിന്റെ ആറാം സീസണാണ് നിലവിൽ സംപ്രേക്ഷണം ചെയ്തു കൊണ്ടിരിക്കുന്നത്. ഇതുവരെ കണ്ട സീസണുകളിൽ നിന്നെല്ലാം വ്യത്യസ്തമായി പല കാര്യങ്ങളും ഈയൊരു സീസണിൽ സംഭവിച്ചു. മികച്ച പ്രകടനം കാഴ്ചവച്ച രണ്ട് മത്സരാർത്ഥികൾ തുടക്കത്തിൽ തന്നെ ഷോയിൽ നിന്നും കൊഴിഞ്ഞു പോയി. പിന്നീട് ആറുപേരെ വൈൽഡ് കാർഡ് എൻട്രിയിലൂടെ ഹൗസിനകത്തേക്ക് പ്രവേശിപ്പിച്ചുവെങ്കിലും കാര്യമായ ചലനങ്ങൾ ഉണ്ടാക്കാൻ ഇവരിൽ ആർക്കും സാധിച്ചില്ല.
എന്നാൽ വൈൽഡ് കാർഡ് എൻട്രിയായി അകത്തു കയറിയ സിബിൻ തന്റേതായ ശൈലിയിൽ കളികൾ നടത്തി നോക്കിയെങ്കിലും സാഹ മത്സരാർത്ഥിക്കെതിരെ തെറ്റായ ഒരു ആംഗ്യം കാണിച്ചതിന് കടുത്ത വിമർശനങ്ങൾ മോഹൻലാലിൽ നിന്നും നേരിടേണ്ടി വന്നു. തുടർന്ന് സിബിൻ കടുത്ത ഡിപ്രഷനിൽ ആവുകയും നിലവിൽ ഡോക്ടറെ കാണാനായി ഹൗസിൽ നിന്നും പുറത്തു പോയിരിക്കുകയുമാണ്.അതിനിടെയാണ് ഹൗസിനുള്ളിൽ എല്ലാവർക്കും പനി പടർന്നു പിടിച്ചു കൊണ്ടിരിക്കുന്നത്. തുടക്കത്തിൽ രശ്മിൻ എന്ന മത്സരാർത്ഥിക്ക് പനി വന്ന് പുറത്തുപോയി തിരിച്ചു വന്നുവെങ്കിലും പിന്നീട് അത് അർജുൻ,ജാസ്മിൻ എന്നിവരിലേക്കും പടരുകയായിരുന്നു. കൂടാതെ വീക്കെൻഡ് എപ്പിസോഡിൽ നടന്ന ഒരു ടാസ്ക്കിന്റെ ഭാഗമായി വൈൽഡ് കാർഡ് എൻട്രിയായി അകത്തു കയറിയ പൂജയ്ക്ക് തിരികെ പോകേണ്ടതായും വന്നു. ഇപ്പോഴിതാ ഹൗസിനുള്ളിലെ ശക്തയായ മത്സരാർത്ഥികളിൽ ഒരാളായ ജാസ്മിൻ ജാഫർ പനിയെ തുടർന്ന് ആശുപത്രിയിലേക്ക് പോകാൻ ഒരുങ്ങുകയാണെന്നാണ് പുറത്തുവരുന്ന വാർത്തകൾ. ഇത്രയും കാര്യങ്ങൾ വച്ച് ബിഗ് ബോസ് ആരാധകർ പറയുന്നത് മലയാളി ബിഗ് ബോസിന് ചെന്നൈ സെറ്റ് ഒട്ടും രാശിയില്ല എന്ന രീതിയിലാണ്.
