ഐശ്വര്യത്തിന്‍റെയും, സമ്പൽസമൃദ്ധിയുടെയും ഉത്സവ ദിനമായ വിഷു ദിനത്തിൽ മലയാളികൾക്ക് ആശംസകൾ നേർന്നുകൊണ്ട് നിരവധി താരങ്ങളാണ് സോഷ്യൽ മീഡിയയിൽ രംഗത്തെത്തിയിരിക്കുന്നത്. മുൻകാലങ്ങളിൽ പ്രധാനമായും പുത്തൻ സിനിമകളുടെ ടീവി റിലീസിനായി കാത്തിരുന്ന മലയാളി പ്രേക്ഷകർ ഇന്ന് തങ്ങളുടെ പ്രിയപ്പെട്ട താരങ്ങളുടെ വിഷു ആശംസകൾ അറിയാനായി കാത്തിരിക്കുകയാണ്.
മലയാളത്തിലെ പ്രധാന നായികാ നായകന്മാർ ഉൾപ്പെടെ വിശേഷാവസരങ്ങളിൽ പ്രേക്ഷകരുമായി കൂടുതൽ ഇടപഴകുന്നതിൽ സോഷ്യൽ മീഡിയ വളരെ വലിയ പങ്കാണ് വഹിച്ചു കൊണ്ടിരിക്കുന്നത്. മലയാളത്തിലെ മിക്ക സെലിബ്രിറ്റി താരങ്ങളും തങ്ങളുടെ പ്രിയ പ്രേക്ഷകർക്കായി വിഷു ആശംസകൾ സോഷ്യൽ മീഡിയ വഴി പങ്കുവെച്ചിട്ടുണ്ട്. മോഹൻലാൽ ഉൾപ്പെടെയുള്ള താരങ്ങൾ വിഷുക്കണി സഹിതമാണ് പോസ്റ്റുകൾ പങ്കു വെച്ചിട്ടുള്ളത്. മമ്മൂട്ടി തന്റെ പ്രിയ പ്രേക്ഷകർക്കായി വിഷു ആശംസകൾ പോസ്റ്റിലൂടെയാണ് പങ്കുവെച്ചിട്ടുള്ളത്.
പണ്ടുകാലങ്ങളിൽ ഒരു കാർഷിക ഉത്സവം എന്ന രീതിയിൽ മാത്രം കണ്ടിരുന്ന വിഷു ഇന്ന് ലോകമെമ്പാടുമുള്ള മലയാളികൾ വലിയ രീതിയിലാണ് ആഘോഷമാക്കി മാറ്റുന്നത്. വിഷുവിന്റെ തലേദിവസം തന്നെ ഓട്ടുരുളിയിൽ കണിക്കൊന്നയും, കണി വെള്ളരിക്കയും, സ്വർണ്ണവും, നാണയങ്ങളും, പുത്തൻ മുണ്ടും വെച്ച് കണിയൊരുക്കുമ്പോൾ പഴയകാല വിഷു വർമകളെ ആരും സ്മരിക്കാതിരിക്കുന്നില്ല. വിഷുദിനം പുലർച്ചയ്ക്ക് കണ്ണുകളെ കുളിരണിയിക്കുന്ന വിഷുക്കണിയിൽ തുടങ്ങി വീട്ടിലെ മുതിർന്ന വ്യക്തിയിൽ നിന്നും കൈനീട്ടം സ്വീകരിക്കുമ്പോൾ ഒരു പുതിയ മലയാള വർഷത്തിന് തുടക്കം കുറിക്കുകയാണ്. എന്നാൽ ഇന്ന് സെലിബ്രേറ്റികൾ ഉൾപ്പെടെയുള്ളവർ തങ്ങളുടെ വിഷു ആഘോഷങ്ങൾ സോഷ്യൽ മീഡിയ വഴി പോസ്റ്റ് ചെയ്യാൻ തുടങ്ങിയതോടെ വിഷുവിന്റെ ആവേശം ഇരട്ടിയായി മാറിയിരിക്കുന്നു.
