റംസാൻ, വിഷു റിലീസായി തിയേറ്ററുകളിൽ എത്തിയ ഫഹദ് ഫാസിൽ ചിത്രമാണ് ആവേശം. പ്രദർശനം നടക്കുന്ന തീയറ്ററുകളിൽ നിന്നെല്ലാം വളരെ മികച്ച രീതിയിലുള്ള പ്രേക്ഷക പ്രതികരണങ്ങളാണ് ചിത്രത്തിന് ലഭിച്ചുകൊണ്ടിരിക്കുന്നത്. ഇപ്പോഴിതാ കോളിവുഡിൽ നിന്നും ചിത്രത്തിന് പ്രശംസ അറിയിച്ചുകൊണ്ട് രംഗത്ത് എത്തിയിരിക്കുകയാണ് കോളിവുഡ് സംവിധായകൻ വിഗ്നേഷ് ശിവ.
ചിത്രത്തിൽ ഒരു ഗ്യാങ്സ്റ്ററുടെ റോളിലാണ് ഫഹദ് എത്തുന്നത്. കന്നഡയും,മലയാളവും മിക്സ് ചെയ്ത് സംസാരിക്കുന്ന ഒരു കഥാപാത്രത്തെയാണ് താരം ചിത്രത്തിൽ അവതരിപ്പിക്കുന്നത്. കോളേജ് പഠനത്തിനായി ബാംഗ്ലൂരിൽ എത്തുന്ന മൂന്ന് വിദ്യാർത്ഥികളും അവർ നേരിടേണ്ടിവരുന്ന പ്രശ്നങ്ങളുമാണ് ചിത്രത്തിന്റെ പ്രമേയം.
രോമാഞ്ചം എന്ന ഹിറ്റ് ചിത്രത്തിന് ശേഷം സംവിധായകൻ ജിത്തു മാധവൻ സംവിധാനം ചെയ്ത ചിത്രമാണ് ആവേശം. ആവേശത്തിൽ ചെയ്ത രംഗൻ എന്ന കഥാപാത്രത്തെ പ്രശംസിച്ചു കൊണ്ടാണ് വിഗ്നേഷ് ശിവ തന്റെ പോസ്റ്റ് പങ്കുവെച്ചിട്ടുള്ളത്. ‘മലയാളം സിനിമ ആവേശം ഒരു രക്ഷയുമില്ല എന്ന ക്യാപ്റഷനോട് കൂടിയാണ് വിഗ്നേഷ് തന്റെ അഭിപ്രായം ഇൻസ്റ്റാഗ്രാം പേജിലൂടെ ഷെയർ ചെയ്തിട്ടുള്ളത്. അതോടൊപ്പം തന്നെ ഫഹദിനെ പ്രത്യേകമായി പ്രശംസിച്ച് ഫഫ അയ്യാ.. എന്നും എഴുതിയിട്ടുണ്ട്. എന്തായാലും വിഷുവിന് പുറത്തിറങ്ങിയ മൂന്നു ചിത്രങ്ങളും മലയാള ബോക്സ് ഓഫീസ് കളക്ഷനുകളിൽ ചരിത്രം രചിക്കുകയാണ്.
