ബംഗളൂരു സ്ഫോടനക്കേസിൽ ഏറെ പ്രതീക്ഷയോടെ കാത്തിരുന്ന അന്തിമവിധി ഇനി വീണ്ടും വൈകാൻ സാധ്യത. വാദം പൂർത്തിയായി വിധി പ്രസ്താവന മാത്രം ബാക്കിയുള്ള ഘട്ടത്തിലാണ് കേസ് മറ്റൊരു കോടതിയിലേക്ക് മാറ്റാൻ കർണാടക ഹൈക്കോടതി തീരുമാനിച്ചത്. ഇതോടെ വർഷങ്ങളായി നീണ്ടുനിൽക്കുന്ന വിചാരണയ്ക്ക് ഉടൻ വിരാമമുണ്ടാകുമെന്ന പ്രതീക്ഷ മങ്ങുകയാണ്.
കേസിന്റെ മുഴുവൻ വാദങ്ങളും ഇതിനകം പൂർത്തിയായ സാഹചര്യത്തിലാണ് പുതിയ ബെഞ്ചിലേക്ക് ഫയൽ കൈമാറിയത്. ഇതോടെ പുതിയ കോടതി കേസ് വീണ്ടും പരിശോധിക്കേണ്ട സാഹചര്യം ഉണ്ടാകുമോയെന്ന ആശങ്കയും നിയമവൃത്തങ്ങളിൽ ഉയരുന്നുണ്ട്. അന്തിമവിധി എപ്പോൾ ഉണ്ടാകുമെന്ന കാര്യത്തിലും ഇപ്പോൾ വ്യക്തതയില്ല.
ഈ കേസിൽ പ്രതികളായ പരപ്പനങ്ങാടി സ്വദേശി സകരിയ ഉൾപ്പെടെയുള്ള മലയാളികൾക്ക് കഴിഞ്ഞ 17 വർഷത്തിലേറെയായി ജാമ്യം ലഭിച്ചിട്ടില്ല. ഇതിൽ ഒന്നര പതിറ്റാണ്ടിലേറെക്കാലം വിചാരണ നടപടികൾ കാര്യമായി പുരോഗമിക്കാതെയാണ് അവർ ജയിലിൽ കഴിഞ്ഞത്. കേസിന്റെ അന്തിമതീർപ്പ് വൈകുന്നത് ഇവരുടെ മോചനസാധ്യതയെയും വീണ്ടും പിന്നോട്ടാക്കുമെന്നാണ് വിലയിരുത്തൽ.
കേസിലെ പ്രധാന പ്രതികളിൽ ഒരാളായ പി.ഡി.പി ചെയർമാൻ അബ്ദുന്നാസിർ മഅ്ദനി ദീർഘകാലം തടവിൽ കഴിഞ്ഞ ശേഷമാണ് ഗുരുതര ആരോഗ്യപ്രശ്നങ്ങൾ പരിഗണിച്ച് സുപ്രീം കോടതി അനുവദിച്ച ജാമ്യത്തിൽ പുറത്തിറങ്ങിയത്. എന്നാൽ കേസ് പുതിയ ബെഞ്ചിലേക്ക് മാറിയതോടെ അന്തിമവിധി വീണ്ടും നീളാൻ സാധ്യതയുണ്ടെന്ന ആശങ്കയാണ് ബന്ധപ്പെട്ടവർക്കിടയിൽ ശക്തമായിരിക്കുന്നത്.
