സൈജു കുറുപ്പിനെ നായകനാക്കി ഒരുക്കുന്ന ‘ഭരതനാട്യം’ സിനിമാ പരമ്പരയുടെ മൂന്നാം ഭാഗം ഔദ്യോഗികമായി പ്രഖ്യാപിച്ചു. ‘രാസലീല’ എന്ന പേരിലാണ് പുതിയ ചിത്രം എത്തുന്നത്. ആദ്യ രണ്ട് ഭാഗങ്ങളിൽ നിന്ന് വ്യത്യസ്തമായി ഹൊറർ കോമഡി ത്രില്ലർ പശ്ചാത്തലത്തിലായിരിക്കും പുതിയ സിനിമ ഒരുക്കുന്നതെന്ന സൂചനയാണ് പ്രഖ്യാപന വീഡിയോ നൽകുന്നത്.
സംവിധായകൻ കൃഷ്ണദാസ് മുരളിയാണ് മൂന്നാം ഭാഗവും ഒരുക്കുന്നത്. തോമസ് തിരുവല്ല ഫിലിംസും സൈജു കുറുപ്പ് എന്റർടെയ്ൻമെന്റ്സും ചേർന്നാണ് ചിത്രം നിർമ്മിക്കുന്നത്. ഫ്രാഞ്ചൈസിയുടെ പുതിയ അധ്യായത്തെക്കുറിച്ചുള്ള പ്രഖ്യാപനം പുറത്തുവന്നതോടെ ആരാധകരും സിനിമാപ്രേമികളും വലിയ ആവേശത്തിലാണ്.
ആദ്യ ചിത്രം കുടുംബപ്രേക്ഷകരെ ലക്ഷ്യമിട്ട ഫീൽ ഗുഡ് എന്റർടെയ്നറായിരുന്നപ്പോൾ, രണ്ടാം ഭാഗമായ ‘മോഹിനിയാട്ടം’ ഡാർക്ക് കോമഡി ശൈലിയിലായിരുന്നു എത്തിയത്. മൂന്നാം ഭാഗം ഹൊറർ കോമഡി മേഖലയിലേക്ക് കടക്കുന്നതോടെ കഥയും അവതരണവും കൂടുതൽ വ്യത്യസ്തമാകുമെന്നാണ് വിലയിരുത്തൽ.
രണ്ടാം ഭാഗത്തിന്റെ വിജയത്തിന് പിന്നാലെയാണ് പുതിയ പ്രഖ്യാപനം. ‘രാസലീല’യും മുൻ ചിത്രങ്ങളുടെ വിജയപാത തുടരുമെന്ന പ്രതീക്ഷയിലാണ് അണിയറപ്രവർത്തകർ. പ്രഖ്യാപനത്തിന് പിന്നാലെ സമൂഹമാധ്യമങ്ങളിലും ചിത്രത്തെക്കുറിച്ചുള്ള ചർച്ചകൾ സജീവമായിട്ടുണ്ട്.
