കൊച്ചി: നടി ഹണി റോസിനെ ചൊല്ലിയ വിവാദത്തിൽ ഒടുവിൽ പരസ്യ മാപ്പപേക്ഷയുമായി വ്യവസായി ബോബി ചെമ്മണൂർ. തന്റെ ഭാഗത്തുനിന്നുണ്ടായ പരാമർശങ്ങൾ ഹണി റോസിനും കുടുംബത്തിനും മാനസികമായി ബുദ്ധിമുട്ടുണ്ടാക്കിയെന്ന് അംഗീകരിച്ച അദ്ദേഹം, അതിൽ ആത്മാർഥമായ ഖേദം രേഖപ്പെടുത്തി. സമൂഹമാധ്യമത്തിലൂടെയാണ് മാപ്പപേക്ഷ പുറത്തുവിട്ടത്. ഇതോടൊപ്പം, തന്റെ പേരിൽ രജിസ്റ്റർ ചെയ്തിരിക്കുന്ന കേസ് ഹണി റോസ് പിൻവലിക്കണമെന്ന അഭ്യർഥനയും അദ്ദേഹം മുന്നോട്ടുവച്ചു.
ഹണി റോസിനെ വേദനിപ്പിക്കാനോ അപമാനിക്കാനോ ഉദ്ദേശിച്ചല്ല താൻ സംസാരിച്ചതെന്ന് ബോബി ചെമ്മണൂർ വ്യക്തമാക്കി. ജീവിതത്തിൽ എല്ലാവരോടും സ്നേഹവും ബഹുമാനവും പുലർത്താൻ ശ്രമിക്കുന്ന വ്യക്തിയാണ് താനെന്നും, സോഷ്യൽ മീഡിയയിൽ പങ്കുവെക്കുന്ന തമാശകളും വിനോദപരമായ ഉള്ളടക്കങ്ങളും ഒരിക്കലും ആരെയും വ്യക്തിപരമായി ലക്ഷ്യമിട്ടുള്ളതല്ലെന്നും അദ്ദേഹം പറഞ്ഞു.
സംഭവത്തിന്റെ ഗൗരവം പിന്നീട് മനസ്സിലായതോടെയാണ് പരസ്യമായി ഖേദം പ്രകടിപ്പിക്കാൻ തീരുമാനിച്ചതെന്നും അദ്ദേഹം കൂട്ടിച്ചേർത്തു. തന്റെ വാക്കുകൾ സൃഷ്ടിച്ച പ്രത്യാഘാതങ്ങളുടെ മുഴുവൻ ഉത്തരവാദിത്തവും ഏറ്റെടുക്കുന്നതായും, ഹണി റോസ് ഈ മാപ്പപേക്ഷ മാനുഷികപരമായി പരിഗണിച്ച് നിയമനടപടികൾ അവസാനിപ്പിക്കുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. വിവാദങ്ങൾ അവസാനിപ്പിച്ച് പോസിറ്റീവായ രീതിയിൽ മുന്നോട്ടുപോകാനാണ് താൻ ആഗ്രഹിക്കുന്നതെന്നും ബോബി ചെമ്മണൂർ വ്യക്തമാക്കി.
ഹണി റോസും ബോബി ചെമ്മണൂരും തമ്മിലുള്ള നിയമവിവാദത്തിന് തുടക്കമായത് ഒരു ജ്വല്ലറി ഉദ്ഘാടന ചടങ്ങിനിടെയുണ്ടായ പരാമർശങ്ങളായിരുന്നു. ലൈംഗിക ചുവയുള്ളതും സ്ത്രീത്വത്തെ അപമാനിക്കുന്നതുമായ പ്രസ്താവനകളാണ് നടത്തിയതെന്നാരോപിച്ച് ഹണി റോസ് എറണാകുളം സെൻട്രൽ പോലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ പോലീസ് ബോബി ചെമ്മണൂരിനെ കസ്റ്റഡിയിലെടുക്കുകയും നിയമനടപടികൾ ആരംഭിക്കുകയും ചെയ്തു.
നിലവിൽ കേസ് നടപടികൾ പുരോഗമിക്കുന്ന സാഹചര്യത്തിലാണ് ബോബി ചെമ്മണൂർ പരസ്യമായി മാപ്പപറഞ്ഞ് ഒത്തുതീർപ്പിനുള്ള സാധ്യത മുന്നോട്ടുവച്ചിരിക്കുന്നത്. അദ്ദേഹത്തിന്റെ അഭ്യർഥനയ്ക്ക് ഹണി റോസിന്റെ പ്രതികരണം എന്തായിരിക്കുമെന്നതാണ് ഇനി ശ്രദ്ധേയമാകുന്നത്.