ഗാലക്സി അപ്പാർട്മെന്റ്സിന് ശേഷം പുതിയ അധ്യായം; കടൽത്തീരത്ത് വീട് നിർമ്മിക്കാൻ സൽമാൻ ഖാൻ..
മുംബൈ: ബോളിവുഡ് താരം സൽമാൻ ഖാൻ ഏറെക്കാലമായി താമസിക്കുന്ന ഗാലക്സി അപ്പാർട്മെന്റ്സിന് പകരമായി പുതിയ കടൽത്തീര ഭവനം നിർമ്മിക്കാൻ ഒരുങ്ങുന്നതായി റിപ്പോർട്ടുകൾ. മുംബൈയിലെ ബാന്ദ്രയിൽ നിർമിക്കുന്ന പുതിയ വസതിയുടെ സ്ഥലത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായതോടെയാണ് വാർത്ത വീണ്ടും ശ്രദ്ധ നേടിയത്.
റിപ്പോർട്ടുകൾ പ്രകാരം, കുടുംബത്തോടൊപ്പം പുതിയ ആറ് നിലകളുള്ള കടൽത്തീര വസതിയിലേക്കാണ് സൽമാൻ ഖാൻ താമസം മാറ്റാൻ പദ്ധതിയിടുന്നത്. പദ്ധതിക്ക് ആവശ്യമായ അനുമതികളും ലഭിച്ചതായാണ് റിപ്പോർട്ടുകൾ സൂചിപ്പിക്കുന്നത്. എന്നാൽ ഈ വിഷയത്തിൽ സൽമാൻ ഖാന്റെ ഭാഗത്തുനിന്ന് ഔദ്യോഗിക പ്രതികരണം ഇതുവരെ ഉണ്ടായിട്ടില്ല.
1970 കളിൽ മുതൽ ഖാൻ കുടുംബത്തിന്റെ പ്രധാന വിലാസമായ ഗാലക്സി അപ്പാർട്മെന്റ്സ് സൽമാൻ ഖാന്റെ ആരാധകർക്കിടയിലും ഏറെ ശ്രദ്ധ നേടിയ സ്ഥലമാണ്. പുതിയ വീട് നിർമ്മിക്കുന്നതോടെ അദ്ദേഹത്തിന്റെ ദീർഘകാല താമസ ചരിത്രത്തിനും പുതിയ വഴിത്തിരിവാകുമെന്നാണ് വിലയിരുത്തൽ.
പുതിയ വസതിയുടെ നിർമ്മാണവുമായി ബന്ധപ്പെട്ട വാർത്തകൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. കടൽക്കാഴ്ചയുള്ള ആഡംബര വീടിന്റെ ചിത്രങ്ങളും സ്ഥലത്തിന്റെ വീഡിയോകളും ആരാധകർ വലിയ തോതിൽ പങ്കുവെക്കുന്നുണ്ട്. അതേസമയം, സിനിമാരംഗത്തും സൽമാൻ ഖാൻ തന്റെ പുതിയ പ്രോജക്ടുകളുമായി തിരക്കിലാണെന്നാണ് റിപ്പോർട്ടുകൾ.
