വിജയ് ആരാധകര്‍ ഏറെ ആകാംക്ഷയോടെ കാത്തിരിക്കുന്ന തമിഴ് ചിത്രം ദ ഗോട്ടിന്‍റെ റിലീസ് തീയതി പ്രഖ്യാപിച്ചു. നിലവിൽ വിദേശത്ത് ചിത്രത്തിന്റെ അവസാനഘട്ട രംഗങ്ങൾ ചിത്രീകരിച്ചു കൊണ്ടിരിക്കുകയാണ്. ചിത്രത്തിന്റെ ക്ലൈമാക്സ് രംഗങ്ങൾ കുറച്ചു ദിവസങ്ങൾക്ക് മുൻപാണ് തിരുവനന്തപുരത്ത് ചിത്രീകരണം പൂർത്തിയാക്കിയത്.
സംവിധായകൻ വെങ്കിട് പ്രഭുവാണ് ഇളയദളപതി വിജയിനെവെച്ച് ദ ഗോട്ട് എന്ന സിനിമ സംവിധാനം ചെയ്യുന്നത്. കേരളത്തിൽ സിനിമയുടെ ചിത്രീകരണം നടക്കുന്ന സമയത്ത് സംവിധായകനും ഒരു വേഷം ഇതിൽ ചെയ്യുന്നുണ്ട് എന്ന രീതിയിൽ അഭ്യൂഹങ്ങൾ പരന്നിരുന്നു. വിജയുടെ കരിയറിലെ 68 മത്തെ ചിത്രമായ ദ ഗോട്ട് 2024 സെപ്റ്റംബർ അഞ്ചിന് തിയേറ്ററുകളിൽ എത്തുമെന്നാണ് റിപ്പോർട്ടുകൾ പറയുന്നത്.
ഏജിഎസ് എന്റർടൈൻമെന്റിന്റെ ബാനറിലാണ് ചിത്രം നിർമ്മിക്കപ്പെട്ടിട്ടുള്ളത്. സിനിമയിൽ വിജയുടെ ജീവിതത്തിലെ രണ്ട് കാലഘട്ടങ്ങൾ കാണിക്കുന്നതിനാൽ ഡി എജിങ് സാങ്കേതികവിദ്യയും സംവിധായകൻ ഉപയോഗപ്പെടുത്തുന്നതായി റിപ്പോർട്ടുകൾ പുറത്തു വന്നിരുന്നു.സിനിമയുടെ ചിത്രീകരണത്തിനായി വിജയ് തിരുവനന്തപുരം എത്തിയപ്പോൾ സംഭവിച്ച കാര്യങ്ങൾ വളരെ വലിയ രീതിയിലാണ് സോഷ്യൽ മീഡിയയിൽ അന്ന് ചർച്ച ചെയ്യപ്പെട്ടിരുന്നത്. നിലവിൽ വിജയ് അഭിനയിച്ച ലിയോ ആണ് തമിഴ് സിനിമകളിൽ കേരളത്തിൽ ഏറ്റവും കൂടുതൽ കളക്ഷൻ റിപ്പോർട്ടുകൾ നേടിയ തമിഴ് ചിത്രം.ദ ഗോട്ടിന് അതിനെ മറി കടക്കാൻ സാധിക്കുമോ എന്നത് കാത്തിരുന്നു കാണാം!
