മലയാളികളുടെ പ്രിയതാരം പൃഥ്വിരാജ് ഹിന്ദിയിൽ വില്ലനായി എത്തുന്ന സിനിമ ‘ബഡേ മിയാൻ ഛോട്ടെ മിയാൻ, റിലീസ് ഒരു ദിവസം കൂടി വൈകിയേക്കും. ഏപ്രിൽ പത്തിന് റിലീസ് ചെയ്യാനായി ഇരുന്നിരുന്ന ചിത്രം ഒരു ദിവസം കൂടി കഴിഞ്ഞ് ഏപ്രിൽ 11ന് ആയിരിക്കും പ്രേക്ഷകരുടെ മുന്നിലേക്ക് എത്തുക. ചിത്രത്തിന്‍റെ റിലീസ് തീയതി മാറ്റിയതുമായി ബന്ധപ്പെട്ട കാര്യങ്ങൾ ചിത്രത്തിലെ മറ്റു പ്രധാന വേഷങ്ങളെ അവതരിപ്പിക്കുന്ന അക്ഷയ് കുമാർ, ടൈഗർ ഷെറോഫ് എന്നിവർ ഇൻസ്റ്റാഗ്രാം പേജ് വഴി ആരാധകർക്കായി പങ്കുവെച്ചിട്ടുണ്ട്.
ചിത്രത്തിൽ പ്രധാന വില്ലന്‍റെ വേഷമാണ് മലയാളികളുടെ പ്രിയ നടൻ പൃഥ്വിരാജ് അവതരിപ്പിക്കുന്നത്. ഇതിനുമുമ്പും അന്യഭാഷ ചിത്രങ്ങളിൽ കഴിവ് തെളിയിച്ച നടനാണ് പൃഥ്വിരാജ്. അതുകൊണ്ടുതന്നെ നടന്‍റെ ഈ ഒരു സിനിമയിലും ആരാധകർക്ക് വലിയ പ്രതീക്ഷയാണ് ഉള്ളത്. ഇതുവരെ കാണാത്ത ഒരു മുഖമായിരിക്കും ബഡേ മിയാൻ ഛോട്ടെ മിയാൻ വേഷത്തിലൂടെ പൃഥ്വിരാജ് ആരാധകർക്ക് മുന്നിൽ അവതരിപ്പിക്കുന്നത് എന്നാണ് അഭ്യൂഹങ്ങൾ സൂചിപ്പിക്കുന്നത്.
കുറച്ചു ദിവസങ്ങൾക്കു മുൻപ് പുറത്തുവിട്ട സിനിമയുടെ ടീസറും, ട്രെയിലറും വലിയ ചർച്ചകൾക്ക് തുടക്കം കുറിച്ചിട്ടുണ്ട്.ആക്ഷന് വളരെയധികം പ്രാധാന്യം നൽകിക്കൊണ്ട് നിർമ്മിച്ചിരിക്കുന്ന ചിത്രത്തിന്‍റെ ഫസ്റ്റ് ലുക്ക് പോസ്റ്റർ ദിവസങ്ങൾക്ക് മുൻപാണ് അണിയറ പ്രവർത്തകർ പുറത്ത് വിട്ടിട്ടുള്ളത്. എന്തായാലും ആടുജീവിതം വലിയ രീതിയിൽ വിജയം കൊയ്തു കൊണ്ടിരിക്കുന്ന ഈയൊരു സമയത്ത് പൃഥ്വിരാജിന്‍റെ വ്യത്യസ്ത വില്ലൻ വേഷവും ആരാധകർ ഏറ്റെടുക്കും എന്നത് തന്നെയാണ് പ്രതീക്ഷ!
