ഫഹദ് ഫാസിലിനെ നായകനാക്കി ജിത്തു മാധവൻ സംവിധാനം ചെയ്ത ചിത്രമാണ് ആവേശം. തിയേറ്ററുകളിൽ വൻ കയ്യടി നേടി കൊണ്ടിരിക്കുന്ന ചിത്രത്തിന്റെ ലൊക്കേഷൻ കാഴ്ചകൾ പങ്കുവെച്ചിരിക്കുകയാണ് അണിയറ പ്രവർത്തകർ. ചിത്രത്തിൽ രങ്കൻ എന്ന കഥാപാത്രത്തെയാണ് ഫഹദ് അവതരിപ്പിച്ചിട്ടുള്ളത്. സിനിമയ്ക്കിടയിൽ രങ്കൻ ചേട്ടൻ ചെയ്യുന്ന റീലിന് വലിയ രീതിയിലുള്ള പ്രതികരണങ്ങളാണ് പ്രേക്ഷകരിൽ നിന്നും ലഭിച്ചു കൊണ്ടിരിക്കുന്നത്.
ഇപ്പോഴിതാ ആ ഒരു ഷോട്ടിന് പുറകിലെ മനോഹര കാഴ്ചകളാണ് അണിയറ പ്രവർത്തകർ സോഷ്യൽ മീഡിയ പേജ് വഴി പങ്കുവെച്ചിട്ടുള്ളത്. ഷോട്ട് പൂർത്തിയാക്കിയ ഉടനെ സെറ്റിലുള്ളവരെല്ലാം പൊട്ടി ചിരിക്കുന്നതായാണ് ഫോട്ടോയിൽ കാണാൻ സാധിക്കുക.കൂടാതെ തന്റെ അഭിനയം കാണാനായി മോണിറ്ററിലേക്ക് നോക്കി നിൽക്കുന്ന ഫഹദിന്റെ ചിത്രങ്ങളും വൈറലാണ്.
സിനിമയുടെ പുതിയതായി പുറത്തുവിട്ട ടീസറിലും ഇത്തരത്തിൽ നിരവധി മനോഹര രംഗങ്ങൾ കോർത്തിണക്കിയിട്ടുണ്ട്. ചിത്രത്തിലെ പ്രധാന കഥാപാത്രമായ രംഗന്റെ ഒരു ടാലന്റ് ടീസർ എന്ന രീതിയിലാണ് പുതിയ ടീസർ പുറത്തിറക്കിയിട്ടുള്ളത്. രോമാഞ്ചം എന്ന ഹിറ്റ് ചിത്രത്തിന് ശേഷം ജിത്തു മാധവന്റെ സംവിധാനത്തിൽ പുറത്തിറങ്ങിയ ചിത്രമാണ് ആവേശം. ബാംഗ്ലൂരിൽ പഠിക്കാനെത്തുന്ന മൂന്ന് വിദ്യാർത്ഥികളും അവരുടെ പ്രശ്നങ്ങളിൽ ഇടപെടുന്ന ഗുണ്ടാ നേതാവായ രംഗനും തമ്മിലുള്ള രസകരമായ രംഗങ്ങളാണ് ചിത്രത്തിന്റെ പ്രമേയം.
