വ്യത്യസ്ത വേഷങ്ങളിൽ ആരാധകരെ വിസ്മയിപ്പിക്കാൻ മമ്മൂക്കളുള്ള കഴിവ് ഒന്ന് വേറെ തന്നെയാണ്. അത്തരത്തിൽ സ്ഥിരം വേഷങ്ങളിൽ നിന്നും ഒന്ന് മാറ്റിപ്പിടിച്ച് കിടിലൻ ലുക്കിൽ മമ്മൂക്ക എത്തുന്ന പുതിയ ചിത്രമാണ് ടർബോ. ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തു വന്നപ്പോൾ തന്നെ ആരാധകർ സിനിമയുടെ റിലീസിനായി കാത്തിരിക്കുകയായിരുന്നു. ഇപ്പോഴിതാ അത്തരം ആകാംക്ഷകൾക്കെല്ലാം വിരാമം ഇട്ടുകൊണ്ട് ടർബോയുടെ റിലീസ് തീയതി പുറത്ത് വിട്ടിരിക്കുകയാണ് അണിയറ പ്രവർത്തകർ.
മമ്മൂട്ടിയെ പ്രധാന കഥാപാത്രമാക്കി വൈശാഖ് സംവിധാനം ചെയ്യുന്ന ചിത്രമാണ് ടർബോ. ആക്ഷൻ കോമഡി ജോണറിൽ പുറത്തിറങ്ങുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് മലയാളികളുടെ പ്രിയ സംവിധായകൻ മിഥുൻ മാനുവൽ തോമസാണ് എന്നതും മറ്റൊരു പ്രത്യേകതയാണ്.
മമ്മൂട്ടി കമ്പനി നിർമ്മിക്കുന്ന അഞ്ചാമത്തെ ചിത്രമായ ടർബോയിൽ ജോസ് എന്ന കഥാപാത്രത്തെയാണ് അദ്ദേഹം അവതരിപ്പിക്കുന്നത്. മമ്മൂട്ടിയെ കൂടാതെ പ്രശസ്ത കന്നഡ താരം രാജ് ബി ഷെട്ടിയും, തെലുഗു സിനിമാതാരം സുനിലും ടർബോയിൽ പ്രധാന വേഷങ്ങൾ അവതരിപ്പിക്കുന്നു. ചിത്രത്തിലെ സംഘട്ടന രംഗങ്ങളിൽ സഹായിച്ചിരിക്കുന്നത് വിയറ്റ്നാം ഫൈറ്റേഴ്സാണ്. ക്രിസ്റ്റോ സേവിയറും സംഘവും ചേർന്നാണ് ചിത്രത്തിലെ സംഗീതം ഒരുക്കിയിരിക്കുന്നത്. എന്തായാലും മമ്മൂട്ടി കിടിലൻ ലുക്കിൽ എത്തുന്ന ടർബോ ജൂൺ 13നാണ് തിയേറ്ററുകളിൽ പ്രദർശനത്തിന് എത്തുക.
